鉛水恐慌遍及幾十個公私型屋邨屋苑，仲有十幾間大中小學都中招，下星期首批幼稚園驗水結果出籠，相信又會成為焦點。添馬艦政府總部2008年動工、2011年先入伙，照計都屬高危，今屆政府咁多有違常理政策，都唔知班高官係咪飲咗鉛水所以影響智力？
不過政府好淡定，冇話要驗政總，原來有原因。立法會秘書處噚日引述建築署回應，通知議員話整個政總項目包括立法會綜合大樓，食水供應系統主要係採用不銹鋼喉管，並以螺絲或逼模機械方法接駁，毋須焊接，所以梁特早就絕「鉛」啦。
不過秘書處亦話，發現宴會廳廚房連接熱水爐嘅一段45厘米長喉管有一個焊接位，為安全計已即日更換為毋須焊接嘅不銹鋼物料；餐廳廚房內由承辦商自行安裝水管中，有部份採用焊接方式安裝，承辦商將盡快安排食水檢測。長毛原來早前都搵咗人驗泛民所處兩層樓啲水，好彩冇事；不過毛哥就冇驗埋建制派嘅樓層喇。
政府興建政總就識用唔使燒焊方法連接食水管，但公屋、學校就用成本低嘅含鉛燒焊法，莫非以為咁就可以推行愚民政策，方便管治？