本土派早排話會派人選區議會，但選舉未到，佢哋竟然鬧內訌！話說香港本土力量主席何志光幾日前po文，話政治上名正言順，行動先可以理直氣壯，又話「漢」就係「漢」，唔係「華夏」，呢句罷明畀說話國師陳雲聽喇，結果國師一怒之下，話要用開宗創派者身份，趕呢班人出城邦派！
國師今次真係好嬲嬲豬㗎，早幾日一口氣係fb寫咗幾個po，鬧爆呢班本土派，話大家唔跟佢套城邦論冇所謂，但唔好反對，又落驅逐令叫啲「小鬼、劣徒」速速離開。何志光亦不甘示弱，話老人政治就係打壓不同思想、搞大一統，有人想區隔就變成小鬼、劣徒。有高登網民形容國師今次嘅舉動係大清洗，有人等食花生，有人撐國師，當然亦有人覺得國師係想獨攬本土派、孤立港獨派。