謝賢（四哥）前日接受鳳凰衛視《魯豫有約》訪問，佢自爆咗幾十年前同曾江嘅恩怨同掌摑事件，呢個訪問真係好豐富，點會唔講下自己嘅事呢。
四哥以前成日俾人話係花花公子，但四哥話自己並唔係傳說中中意玩女人同咁鍾意賭錢，話自己對歷任太太同女友都好專一，分咗手都係重係好朋友。四哥話自己經歷過兩段婚姻，強調唔打算再結婚，佢都係中意自己一個人自在生活，結婚只係多一張紙，唔代表乜嘢喎。
四哥又用「糊里糊塗」過一世嚟形容自己，話試過有次食飯，朋友介紹佢同另一枱一位女性打招呼，當時佢冇乜感覺，打完招呼就返自己個位坐，點知朋友話剛才介紹嗰位係佢分開咗20幾年嘅前妻甄珍，四哥當時竟然認唔出，搞到佢好內疚，內疚到今時今日。
另外，昨日記者致電曾江，講到四哥爆以前恩怨，接電話嘅係佢太太焦姣，焦姣話曾江打緊波，而佢自己亦唔回應啦。