張立基、𡃁模艾美琦（Amy）、黃夏蕙同李龍基噚日出席喺旺角一戲院舉行嘅活動時，張立基自爆未婚妻Fiona早前入咗醫院進行人工流產手術，佢話：「小產咗，太太（未婚妻）休養中，唔係開心事本來唔想講，不過遲早知所以自己講。」張立基透露早排Fiona肚痛入醫院，醫生檢查之後話太太嘅情況唔理想，所以安排進行人工流產手術，佢話早排喺微博講嘅「小手術」就係呢個，而Fiona入院已一個禮拜。
雙重打擊
張立基話件事對佢哋兩個打擊都好大，特別係自己媽媽7月先至仙遊，𠵱家Fiona又流產，佢話：「唔開心，不過一齊度過啦，原因唔好講嘞，呢半年至一年內都唔會再要細路住，之後再講。」張立基又透露早前講好嘅婚禮會順延，佢話：「守孝都100日啦，呢一年都唔會搞住。」
另外，早前張立基話過對張媽媽嘅死因懷疑係醫療失誤，佢話要等埋醫療報告至決定係咪追究醫院疏忽。
撰文：馮仁昭
