近年狀元唔係讀醫，就係讀Law，搞到工程好似變成二奶科目。港鐵工程總監黃唯銘剛當選工程師學會副會長，佢都覺得工程師對社會同樣有好大貢獻，但係專業形象好似唔及醫生同律師，所以上任後其中一個工作重點，就係提升工程師喺公眾心目中嘅形象。
之前TVB一套神劇《衝上雲霄》，報讀飛機工程維修嘅人都多咗。如果搵張智霖扮工程師拍番套劇，應該可以令工程師形象更入屋，至少師奶唔會再誤會讀工程即係做地盤無出色。
黃唯銘話非正式同TVB接觸過，點知對方開價1,000萬，拍20集，即係一集要50萬。嫌貴？都有平啲嘅方式，可以喺其他劇入面加個工程師角色，但都要300萬。工程師學會唔係大財團，邊有咁多錢，惟有再諗其他方式啦。