鬼節睇鬼片，鬼古幾時都啱聽，兩位鬼后鮑姐同音音姐講真人真事的靈異經歷。
音音姐形容人鬼外表沒兩樣，只是冇喜怒哀樂，她記得一個與明天59歲冥壽的張國榮相關的靈異事：「張國榮出殯嗰日，我同芳華（前國泰電影公司年代藝人）發紀念冊，見到排第三個嘅fans着白衫西褲好似張國榮，芳華都話『係喎咁似嘅』，點知個fans到咗我哋面前，係個戴眼鏡肥仔，即係我哋撞鬼。到第二日去到殯儀館，望出去又見到好似張國榮嘅男仔趴咗喺欄杆，其他人都話『係喎好似喎』，即係大家都見到。」
鮑姐：有嘢入侵我身體
殯儀館有幾猛？鮑姐試過入錯殯儀館「出事」，她說：「雖然見唔到但感覺好深，嗰次媽咪出殯我去錯隔籬間殯儀館，我一入去，一生人未試過，覺得有啲唔知乜嘢要入侵我身體，我已經覺得係有嘢。當去到我媽媽嘅靈堂，我相信係媽媽保佑，開始係咁嘔，嘔足咁多個鐘，感覺係要將所有嘢都嘔番出嚟，之後去睇急症，醫生話『感冒，打支針冇事』，到第二日又乜嘢事都冇。」