近排九建（034）旗下紅磡劏房之城環海．東岸成功搶盡市場目光，效力九建4年嘅市務及銷售部總經理楊聰永應記一功，事關佢每次現身推銷都拎住大大件道具，噚日直情搵埋臨記幫手，堪稱九建「道具王」，不過大家覺唔覺得呢種手法似曾相識呢？
查實楊聰永之前喺超人李嘉誠旗下長實地產（1113）做營業經理，跟過鍾意扮鬼扮馬賣樓嘅樓神趙國雄（老趙），曾協力多個大盤，包括大圍名城，當時經常聯同舊上司齊齊舉牌為樓盤造勢。
唔知係咪舉開有鋪癮，如今轉到效力「澳門李嘉誠」柯為湘旗下九建，都繼續舉牌，仲出動埋臨記。
佢噚日請人扮「白居易」，話要帶畀真正白居二申請者喜訊，白居二申請者月底前買環海．東岸就有禮券送。佢解釋，新優惠係想幫政府「排洪」，令申請白居二買家多一個選擇咁話喎。