中大博群計劃嘅無止橋學生團隊同清華大學及重慶大學合作，喺啱啱過咗嘅暑假到咗重慶市彭水縣蘆塘鄉星光村，為當地百幾名學生哥返學必經之路建行人便橋，畀佢哋喺惡劣天氣下仲可安全上學，同時亦建設儲水池等等，協助當地村民改善生活。
中大校長沈祖堯唔單止隨行，落手落腳之餘，仲贊助送出保溫瓶，鼓勵村民多啲飲水，認真唔話得。而呢次項目整體就由九龍倉贊助。
呢次嘅中大團隊包括七個嚟自唔同學系嘅學生，佢哋早喺去年8月同今年3月已到星光村實地視察，確定建橋地點同設計方案，佢哋此行亦為當地嘅星光學校設置圖書閣，購置書架同百幾本書。祖堯BB勁讚學生團隊出心出力，話相信同學可以喺多元化嘅服務中，獲得課堂以外嘅寶貴知識同體驗呀。