農曆七月的恐怖氣氛剛過，緊接就是全城狂歡的哈囉喂。自嘲是無膽鬼的吳日言（Yan），昨日親自到海洋公園挑戰三大鬼屋，由入門級玩到中階級，嚇到差啲喊的Yan，笑言萬聖節當晚要再挑戰：「我要約埋幾個女藝人，齊齊落晒妝咁嚟玩，夠驚啦啩？」
採訪：盧妹
攝影：沈健程
（以5個★為最高）
鬼屋1：嚇人經典集合
驚嚇程度：★★★
中階級的《十五年驚異回魂》，專為海洋公園哈囉喂15周年而設，回顧過去的經典「嚇死人冇命賠」的主題，雖然阿Yan驚到震，但都勇敢硬闖！小丑、殭屍、鬼步兵及鬼看更等等，阿Yan每行一步都小心翼翼，大叫及半蹲式走路是指定動作，一入鬼屋已經被閃出的「鏡鬼」嚇親。接着長長的黃符、高大恐怖的殭屍，突然，真殭屍跳出，阿Yan坦言嚇到喊：「好似個個都係真咁，我都預咗佢跳過嚟，但都係畀佢嚇到。」
鬼屋2：合家歡機關暴走
驚嚇程度：★
合家歡式的零驚嚇「鬼屋」《生化突變大暴走》，日間是純體力消耗的充氣障礙賽，夜間會變成毒霧瀰漫的《異種突襲大逃亡》。充氣鬼屋佈滿機關，要攀過高高的充氣牆、瀡滑梯、被巨型充氣棒棒夾擊及擺動的巨型鐮刀等，近日迷上做運動的阿Yan，體力勞動絕對冇難度。為了配合拍攝，阿Yan爬高擒低不特止，她又鬼馬爬到巨型鐮刀上拍照。不過，膽小的她原來在冇鬼的情況下都驚：「因為瀡滑梯嗰陣都有離心力，真係有啲驚，但係如果幾個朋友玩鬥快會好好玩。」
鬼屋3：鬼怪集郵聖地
驚嚇程度：★★
入門級《甜心蘿莉大宅》同樣是日夜變身的鬼屋，日頭是美少女們的自拍聖地，而晚間變身《血咒哥特古宅》。雖然日頭Lolita未變身，但大宅仍然滲出絲絲怪異感覺，阿Yan行兩步退一步，確保前方安全。期間，Lolita不斷邀請阿Yan合照，愛自拍的她當然亦拿出手機拍拍拍。事後，她大讚鬼屋設計夠細心：「冇諗過可以咁樣畀人影相，好啱我呢啲咁怕鬼嘅女仔，唔使吓吓咁驚。」
日期：9月18日至11月1日（逢星期五至日）
票價：$345（成人）、$173（小童）