樂視全力進軍香港網絡電視巿場，大灑金錢開拍多套網劇，曾國祥、徐偉棟和陳宇琛率先合拍網劇《我的老千生涯》試水溫。3位星二代日前接受專訪，大談星爸，曾國祥認為曾志偉難以超越，最開心是高過老竇；徐偉棟跟徐少強如餅印，他最怕模仿老竇做大俠出如來神掌；陳宇琛雖是石修之子，卻不及方力申似爸爸，相當好笑！
撰文：楊潔雯
曾國祥、徐偉棟和陳宇琛（石仔）的共通點，是有一個藝人爸爸。父蔭對他們來講，是幫助，亦是壓力，其中曾國祥說：「細個剛入行好有（壓力），好介意人哋話『曾志偉個仔』咁嗌你，𠵱家接受咗，如果到𠵱家都有人咁講，嗰啲就係惡意去傷害，有留意開就知我係做緊自己嘢，不過做得好唔好係一件事。我係一路努力做緊自己嘢，如果真係要咁講，我覺得無需要再講乜去證明。」
擺脫父親影子
曾志偉的名氣，對曾國祥的星途絕對有幫助，他說：「有少少啦！始終內地有少少人識，你係曾志偉個仔，甚至有啲微博上面嘅粉絲，佢哋follow咗我，後尾先知我係曾志偉個仔，佢哋聽到好詫異，有冇搞錯你係曾志偉個仔？完全睇唔出！最主要係身高，托賴，靚仔過佢我唔敢講，身高係自己努力番嚟，自己知道唔想好似老竇咁嘅高度咪搏命打籃球，人哋話打籃球會高，咁我起碼有番正常嘅高度先。」
徐少強是武俠電影中的大俠，形象深入民心，舉手投足跟老爸一模一樣的徐偉棟，最難擺脫父親的影子，他說：「盡量唔想去模仿佢，我就係唔想成日咁似佢，孭住個包伏，我都想有自己要行嘅路，想演一啲唔同嘅角式，唔想被定型。佢畀人定型係大俠，佢係生存喺古代，唔應該生存喺現代，呢個係佢build up嘅形象，所以，我覺得應該以佢為目標，要做一樣嘢等人記得。」
尋獲「失散兄弟」
最近又再傳石修跟方力申是失散多年的父子，令石仔被取笑不似石修，他哈哈大笑：「我可能係執番來，佢（石修）又唔知係邊度生方力申出來，哈哈！我剛入行大家已經講呢樣嘢，講咗好耐，其實喺方力申出道已經講緊，出道冇人信石修係我老竇，所以錯咗，幾得意，有個咁似阿爸嘅人，其實我有同方力申合作過，拍劇係做兩兄弟，感覺好奇怪，嗰陣講到𠵱家，已經當佢一家人咁，係一個好耐冇見嘅阿哥同細佬咁。」
場地提供：觀塘帝盛酒店
徐偉棟
髮型：Amber Tse of Alchemy
化妝：Yvonne.A
服裝：Chevignon
曾國祥
髮型：Ken Hui of ii hair& nail
化妝：KingYip of KINGS MAKEUP