前日出發去台灣取經嘅公民黨立法會議員郭家麒，噚日同台北市長「柯P」柯文哲會面，原先擔心自己普通話唔掂嘅郭醫生，去到發現自己普通話尚可溝通，未有嚇親柯P，交流之後仲發現台北市人口有大概260萬，同佢服務開嘅新界西人數不相伯仲。
郭醫生引述柯P好關心香港情況，包括立法會組成、雨傘運動後社會氣氛等，話對香港最終爭取到民主感樂觀，柯P仲話香港同台北交流不足，笑指一向由台北同上海搞開嘅雙城論壇，應改成香港同台北舉行喎。
郭醫生仲特別喺台北街頭跑步，發現隨處可見飲水機，飲起嚟覺得味道幾好，仲話台北自來水事業處嘅陳曼莉副處長話佢聽，台北飲水機嘅水可以直接飲用，毋須過濾，飲水機水質報告更會喺網上公佈，恨死飲鉛水嘅香港人囉。