每年海洋公園哈囉喂都係城中盛事，唔經唔覺今年已經15周年，今次仲一次過推8間鬼屋「嚇餐飽」。八方噚日就搶先試玩十五年驚異回魂鬼屋，裏面集合過去14年嚟嘅恐怖元素，好似恐怖電梯、殭屍咁，驚嚇度十足。
18號開始下一輪預約
而甜心蘿莉大宅就有另一番體驗，少女化身成可愛Lolita，喺精美嘅大屋入面同你玩自拍，每日仲會揀出一張最攪怪Selfie上載到網頁。但一到咗夜晚，大宅就會變成恐怖古宅，少女亦會露出邪惡一面，生擒活人飲鮮血。
同樣係日夜大變身，首次推出嘅戶外鬼屋生化突變大暴走，由8個吹氣組件砌成嘅賽道全長40米，只要夠1.2米高就玩得，日頭可以鬥快穿越障礙物，夜晚仲要防備怪獸突襲。小朋友亦可以行小南瓜糖果遊，沿途盡情同嘩鬼拎糖食。
海洋公園哈囉喂演藝節目總監歐陽綺華話，一班嘩鬼由8月開始已經日日綵排。而為免遊客等太耐，日夜鬼屋轉場時間只要15分鐘。至於最令人期待嘅H15鬼屋，頭一輪網上預約8分鐘就額滿，第二、三輪都喺一個鐘之內俾人搶晒，下一輪預約會喺18號下奏4點半開始。
李八方
mailto:[email protected]
