坐飛機嗰陣，空姐空少都會畀一個膠杯裝嘅飲品你，大家唔好睇小呢隻杯，實情一隻杯都可以為環保出一分力。國泰噚日介紹佢哋呢幾年嚟喺環保方面嘅成果，自2013年開始，國泰更換咗15萬隻膠杯，新膠杯比舊款輕三成，咁就令飛機負重少咗，用嘅燃料亦少咗，繼而達致減低碳排放。真係小莫小於水滴。
除咗換上新款膠杯，航班每次飛完有好多剩餘物資，好似玻璃樽咁，國泰舊年年尾開始拎啲樽去回收，變成一嚿嚿嘅磚頭，而磚頭又可以用番嚟鋪路。飛機上面用嘅地毯就用廢棄魚網製造，當然飛機上面嘅雜誌、餐單呢類紙製品都係用環保紙造啦。
至於廚餘方面，國泰會計算好每班機要準備幾多飛機餐、捐出未食過嘅食物同埋將部份廚餘變成飼料，但由於分類比較難，所以唔少廚餘都要丟棄，呢方面要急起直追喇。