曼聯星期六就會喺英超硬撼宿敵利物浦，但賽前傳出壞消息，英國《太陽報》收到風，紅魔醖釀兵變，班球員唔滿意領隊雲高爾嘅訓練太刻板，但雲帥就一於少理，意見接受，但態度照舊，再咁搞落去，雲高爾會唔會成為下個莫耶斯呢？
朗尼同卡域克先表態
雲高爾喺球壇打滾咁多年，毀譽參半，有人讚佢超越時代，鍾意提拔年輕人，亦有人話佢死牛一邊頸，無論戰術訓練，定係做人處世都太固執刻板。告魯夫都插過雲帥：「我哋諗法好唔同，我會畀球員自由發揮，但雲高爾就要將一切都控制得妥妥當當。」畀雲高爾教咗一年後，班曼聯球員都開始頂唔順。喺開季贏完熱刺後，球員派咗幾個代表去同雲高爾反映民情，據英國《每日郵報》講，代表就係隊長朗尼同副隊長卡域克。
球員代表話大家都唔鍾意呢啲千篇一律、不斷重覆嘅訓練，令球員冇得發揮。可能雲高爾嗰陣扮晒開明，係咁話：「係！係！知道！」但原來係當你冇到，你有你投訴，佢有佢態度，完全冇改到，搞到成隊波好躁。曼聯頭嗰兩場叫做贏波，都算可以用成績撳得住球員把火，但近兩仗英超和完又輸，班球員越嚟越唔高興，大家都開始質疑雲帥戰術守舊，搞到球隊進攻啞火。
練波唔准笑似上堂
據英國《太陽報》嘅消息話，自從雲高爾入主後，卡靈頓訓練基地都少咗好多笑聲，因為佢下咗命令，訓練期間唔准講笑、唔准玩，搞到好似小學生喺操場罰企咁悶同嚴肅（見附表）。中場費蘭尼上季都講過，雲高爾對紀律嘅要求非常嚴格，球隊去餐廳食飯，佢遲咗一分鐘就被罰錢。除咗內部質疑，雲高爾同樣要面對來自球迷同傳媒嘅壓力，例如曼聯將查維亞靴南迪斯同尹佩斯送走，就連青訓小將占士威爾遜都聽聞就嚟外借至打比郡，但就用幾千萬鎊買咗19歲嘅安東尼馬迪爾返嚟。喺日前嘅活動，都有人問雲帥，佢就遊吓花園話：「我係用咗好多錢買馬迪爾，但我係為我嘅接班人傑斯而買。」
另外，據西班牙傳媒披露，迪基亞轉會皇家馬德里告吹，佢經理人佐治文迪斯同皇馬主席佩雷斯不和，話唔定迪基亞會續約曼聯。