明天是農曆七月三十，相傳是鬼門關關門之期。在鬼節最後的十幾個時辰，找來兩大鬼后，《殭屍》的鮑起靜及《迷離夜》的邵音音講經歷、分享鬼古。後生時是《官人我要》的性感女星音音姐，年長後轉演問米婆非常出色，更自爆一個被隱藏多年的秘密──原來她與特首梁振英一樣，都是農曆七月十四鬼節出生。
撰文：何永寧
兩位鬼后邵音音及鮑起靜早前在奧海城為電影《碟仙碟仙》宣傳接受訪問，音音姐一開始便自爆一直被母親瞞騙自己的出生日期，她笑說：「早排媽咪喺美國返港，臨走時佢話『其實你係農曆七月十四生日，唔係十五』，我話『阿媽到底你仲有幾多秘密瞞住我？』」音音姐解釋，在她們的年代如果孩子生於鬼節，不但小朋友會被歧視，母親亦會被視為不吉利，所以音音媽一直都隱瞞她的生日。
鮑姐與音音姐均以演技着稱，近年演鬼片有出色表現，她們不約而同相信鬼神之說，鮑姐說：「我相信呢個世界唔止得人呢個空間，應該有幾個空間，因為宇宙實在太大。」音音姐則說：「你睇美國好多戲都用第四度空間、第六度呀，又講太空人返咗嚟、個女聽到嗰老竇把聲但見唔到佢，呢啲咪我哋中國人講嘅靈異囉，係有呢樣嘢，不過我哋科學未解釋到。」
日本鬼片最恐怖
作為鬼后，她們都認為日本片最恐怖，鮑姐由細到大都不喜歡看鬼片，只有早年被囡囡帶去看過一部《午夜凶鈴》，她說：「我真係好驚，不過我個女話『媽咪你一定要睇，咁經典嘅戲人哋拍得咁好』，佢之前已經將最恐怖場面講晒我聽，有心理準備，但都用手遮住對眼，雖然冇睇到佢爬出電視機嗰場，憑想像原來仲驚。」
音音姐就認為泰國鬼片，仍不及古早味的日本出品：「好多日本片《四谷怪談》、《九命怪貓》總之啲貓一出現『喵』，啲屍體同啲紙門就有血，嚇到死。」
音音姐險成「替身」
拍戲多年，兩位鬼后都試過在片場遇到靈異事件，音音姐印象最深的是當年為亞視拍劇：「嗰日下晝同潘翁（潘志文）喺水塘開工拍《園中緣》，拍到攰喺地下瞓晏覺，忽然見到一個石頭人拖我隻腳，嗰時我覺得係發夢。不過潘翁話真係見我隻腳遞起郁緊去水邊，佢哋事後話年年都會搵替身入水塘。之後返到屋企照鏡，都仲係見到嗰個石頭人，維持咗兩個月。」