【銅鑼灣】古天樂同林峯當年拍劇集《尋秦記》時傳出不和，有指古仔唔鍾意演自己徒弟嘅林峯喺外形同膚色都刻意模仿自己。不過最近有傳古仔計劃拉攏原班人馬下年開拍《尋秦記》電影版，前晚本報記者發現兩人約埋飯局，古仔似足大佬咁搭住林峯膊頭，兩人仲着住款式類似嘅兄弟鞋，友誼萬歲。
前晚大約9點幾，記者喺古仔投資、位於銅鑼灣嘅名廚食肆，首先發現劉青雲架保母車泊喺樓下，一個鐘之後，見到青雲、吳鎮宇同張達明先行離去，三人都飲到面紅紅，低調嘅青雲見到記者，表現得唔多想影相，鎮宇就笑笑口打招呼，仲上咗青雲車返屋企。達明就一個人截的士走，抗癌勇士達明雖然外形仲好瘦，但精神唔錯，塊面仲飲到紅過關公。
送落樓搭的士
直至11點，古仔就搭住林峯膊頭行出𨋢，兩人同樣飲到面紅紅，一身名牌嘅古仔，着住Thom Browne外套襯Dsquared塗鴉牛仔褲，腳踏價值$5,300元Valentino波鞋，多年前被傳過刻意模仿古仔嘅林峯，呢晚着住嘅波鞋款式，咁啱又同古仔對鞋咁似！
記者問點解咁齊人嘅？古仔鬼馬話：「唔齊人，得兩條友啫。」係咪傾大計？古仔隨口話：「係呀，好大計。」飲咗酒嘅林峯call的士走，原來古仔特登送林峯落樓搭車，兩人分手前仲互拍一下，表現得老友鬼鬼。
採訪、攝影：徐錦池、羅德光
