陪住香港人長大嘅維他奶（345），最近推出兩款「飲得到嘅小食」（VITASOY GO系列），分別有燕麥餅與香蕉班戟味，雖然聽見個名已經有啲O嘴，但為咗走在時代尖端，華華都會去試飲嘅。
華華噚日就率先跟幾位同事一齊試味，一個二個都皺晒眉頭，話「好難飲」、「香蕉味好假」、「好似BB飲糊仔咁」，比較厚道嘅同事就話「杰得嚟都有啲飽肚感嘅」。
口味呢家嘢見仁見智，為公道起見，走去睇睇維他奶facebook專頁嘅網民留言，公司問大家「覺得幾時飲VITASOY GO先最啱？」唔知係咪呢兩隻新產品唔多適合香港人口味，有戲飛送，都阻止唔到網民講真話，有人話「我認為VITASOY GO難飲得滯……咩時間都唔啱飲」。
其實，難得一間老牌企業不時有新嘗試，大家都應該畀個like嘅，呢個新產品旨在畀人少少肚餓，但又唔方便食嘢時，飲嚟頂吓肚，背後心思真係抵讚，而且創意十足，可惜今時今日大家都話健康飲食，口味都係簡單、少甜最好。