港股經歷五窮六絕七更窮八更絕之後，以為9月仍熊運當頭，點知呢兩日忽然挾淡倉大反彈。恒指由20524彈至22228，幅度達8.3%，後市要睇係咪有力突破短線阻力位22400，形成小雙底，抑或受制前高位，出現獲利回吐。
其實，市場呢兩日冇乜特別好消息，但大市已連跌4個月，恒指跌到20500邊緣，H指跌到9000邊緣，市盈率分別只有8.9倍及6.5倍，已反映嚴重超賣，累積大量淡倉，吊頸都要唞吓氣，挾淡倉都好合理。不過，現時係反彈行情，未確定轉勢，要注意控制好倉位！
睇中外市況，又似乎係有轉勢迹象。除了環球股市造好外，昨午美國30年長債孳息升至2.985厘，逼近3厘高位；隔晚期油、期銅等商品又全線急升4%至5%，在在反映投資者風險胃納回升，資金重投風險資產。
中鐵建有運行
不過，現時入市，我只會小注，想等多陣，等乜？唔係等埋發叔或首副，而係等埋耶倫（Janet Yellen），以提高操盤準繩度！9月戲肉係美國議息，全世界都等緊聯儲局主席耶倫表態，唔知下周四開大定開細，想等埋息口明朗化先。
睇番內地，近日中央救市策略改變，由國家隊入市，改為由中金所挾淡。中金所6個交易日內3度調高期指按金及手續費，又將開倉超過10手界定為異常交易。在期指非套保持倉按金高達四成下，槓桿比率降至2.5倍，而融資成本郁啲都超過10厘，炒家持淡倉成本及風險大增，呢招成功挾走大量淡倉，A股亦連日反彈。
我呢排比較留意基建股中鐵建（1186），原因簡單，就係內地經濟差，差就要救，救就要靠基建投資。周一、周二出爐的外滙儲備和外貿數據再令市場失望，加上之前的GDP、PMI等數據都好差，經濟減速係不爭的事實，中央今年餘下時間，肯定會以基建投資來拉動經濟；加上現時至年底為基建工程旺季，基建股有運行。
滙豐證券料中央為保七，或採取大包圍刺激經濟措施，包括發行3萬億至5萬億元人民幣長債，推動基建。中央已計劃3年內分批發行1.2萬億元人民幣專項建設債券。中鐵建係內地基建龍頭，預測PE 9.2倍，至6月底淨負債比率約40%，估值和負債比另一龍頭中鐵（390）為低，中鐵預測PE 10.8倍，負債約80%。中鐵建昨收10.92元，升4%，逢低收集，睇12元。
割柑人
本欄逢周四刊出