政務司司長林鄭月娥自從宣傳政改時，坐過開篷巴士堅離地式落區後，一般市民都懷疑仲有冇機會喺街上見到林鄭？估唔到八方噚日就喺星光大道野生捕獲對方，林鄭仲腳踏實地視察，同行仲有民政事務局常任秘書長馮程淑儀、康文署署長李美嫦㖭。
林鄭呢次落區，事前無通知傳媒，八方都係收到風先見到佢，但林鄭一見八方就有啲黑面，又唔望鏡頭。佢哋一行人走入文化中心開會近90分鐘後先至走人。八方上前追問星光大道擴建計劃冇公開招標就交畀新世界，外界質疑私相授受？林鄭講不出聲，快步上車離開。星光大道已經變成梁班子新嘅政治炸彈，唔知林鄭今次開會有冇諗到點拆彈？