摩連奴隊車路士今季中門大開，四場英超失成九球咁多，估唔到佢個女亦一樣。呢位52歲葡萄牙名帥周二晚帶埋佢囡囡瑪泰德出席《GQ》年度男士頒獎禮，但佢就全程黑面，就連上台領獎時嘅笑容都好牽強，唔知係因為愁緊點幫車仔打番上嚟，定還是「唔老利」囡囡條裙太過性感，露東西半球益街坊呢？
球隊同個女齊開中門
著名男士時尚雜誌《GQ》周二晚喺倫敦舉行年度男士頒獎禮，英國體壇好多名人包括F1車手咸姆頓、英格蘭殿堂級射手連尼加，同埋當選《GQ》編輯年度特別大獎嘅車仔領隊摩連奴都有出席。車仔今季英超開季開得差，頭四場聯賽只係攞到一勝一和兩負，兼且居然失咗九球，仲少四戰全勝嘅曼城八分，所以原先啲人都估摩佬未必會嚟。但係，本身係廿四孝爸爸嘅摩佬喺紅地毯接受訪問時話，佢為咗18歲大嘅囡囡瑪泰德，於是先接受大會邀請嚟攞獎。
咁又係，囡囡都就嚟廿歲，加上因為同樂隊One Direction嘅Niall Horan熟而間唔中上娛樂版，做老竇嘅係時候帶佢嚟吓呢啲大場面。摩佬同瑪泰德喺衣着上明顯夾過，皆因瑪泰德件晚裝係黑色兼禮服設計，同摩佬身上嘅黑色「踢死兔」襯到絕。但係，瑪泰德條裙係中空裝設計，加上佢裏面真空，東西半球即時盡現，佢亦相當小心，一路行、一路拉番好前面個位，費事走光；佢靚唔靚女就見仁見智，不過肯定就身材勁好。
伊娃未解凍要告車仔
雖則囡囡同自己好襯，但見到瑪泰德打開心口俾現場啲麻甩佬係咁「贒」，「唔老利」就一定有，所以摩佬成晚都黑口黑面，就連上台領獎時嘅笑容都鬼死咁牽強，難聽啲好似去奔喪咁樣。當然，車仔季初踢得差，兼同女軍醫伊娃單嘢搞到一鑊粥，亦係導致摩佬變咗「包大人」嘅原因。
另外，喺英超首戰被指犯錯而打入冷宮嘅女軍醫伊娃，家陣仲未獲解凍，仲係唔可以出席球隊嘅比賽或練習；而呢位41歲嘅靚女軍醫表明，若然車仔唔盡快恢復佢嘅職務，就會向會方採取法律行動。