最新一期《壹週刊》刊出壹傳媒創辦人黎智英（圖）嘅專訪，肥佬黎喺訪問中點評主要政治人物，佢斷言梁振英已失勢，連任無望。
至於下任特首人選，肥佬黎話唔太睇好政務司司長林鄭月娥，話林鄭已經「散晒」，仲因為「有求」，個人能力冇財政司司長曾俊華咁好，認為鬍鬚曾有可能做下一任特首，話佢為人老實、為人無求，若遇上別人搞佢，佢最多唔做，總之就好過前財爺梁錦松，肥佬黎就咁講：「（曾俊華）信得過啲，唔會吹牛，唔會亂嚟。」
「賣《蘋果》會衰一世」
對於近日傳媒界經常討論嘅紙媒前景，肥佬黎估算，報紙仲要玩多10年8年，雜誌就會提早遭淘汰，手機睇新聞則會喺3、5年之內完全佔據市場。
肥佬黎仲將自己同壹傳媒嘅關係譬如為婚姻，強調唔會離婚，話唔係錢嘅問題，而係《壹週刊》、《蘋果》屬於香港，如果賣咗，佢將會衰一世，俾人鬧足一世。