早前退出公民黨兼辭埋立法會議員一職嘅大狀湯家驊，噚日返立法會出席泛民集思會，點知佢入咗會議室無耐就退席，原來係公民黨黨魁梁家傑以泛民未傾完上一個議題為由，指湯狀「未夠鐘」勒令佢離場，令一心想交代見京官情況嘅湯狀好無癮，面黑黑行出去時講：「咁即係唔當我係泛民啦？」
幾分鐘後，白鴿黨何俊仁做和事老，親自出嚟邀請湯狀返入去開會。湯大狀會後明顯未收火，當記者要求泛民合照時，傑哥身為飯盒會召集人叫湯狀「坐埋啲」，湯狀say no：「𠵱家個距離幾好。」當傑哥邀請湯狀講述會上嘅意見時，湯狀亦只淡淡回應「冇補充」。傑哥事後承認主持會議時出咗問題，但覺得最緊要係湯狀最終都同泛民一齊開會。