無線上周播完《誓不低頭》，秋官拜拜，股市即刻迎來大反彈。喺內地亦有一部神劇《花千骨》，對股市殺傷力不下於丁蟹效應，該劇終於喺周一播出大結局，被視為股市最大利好消息。中港兩地股壇殺神同時拜拜，難怪呢兩日反彈幅度驚人！
《花千骨》係湖南衛視播出的偶像劇，改編自網路小說，開播以來收視率屢創新高。6月9日該劇首播，當日滬綜指5113點，之後一路向下，最多瀉逾四成。《花千骨》原定為50集，8月尾就應該播完，內地股民以為呢場股災終於可以結束。點知由於套劇太收得，湖南衛視宣佈加碼播8集，拉長到58集。消息一公佈，簡直晴天霹靂，滬綜指喺8月24日狂瀉逾8%！
點解呢套劇殺傷力咁大？因為《花千骨》與「滑千股」普通話諧音，播出以來，A股不斷上演千股跌停、千股停牌的奇景，股市猶如滑入無底深潭，成為最大凶兆。
不過，一劇死一劇鳴，股民亦未必可以完全樂觀。湯告魯斯主演的《職業特工隊5》，9月8日喺內地上畫，該片內地譯名為《碟中諜5》，普通話諧音「跌中跌」……
黃尹華