馬國明（馬明）近排緋聞認真旺，啱啱話佢同唐詩詠喺澳洲開工嗰陣，日日喺微博貼合照，又有知情人士話詩詠三更半夜仲喺馬明間房入面傾偈，但實情佢哋兩個只係契兄妹關係，大家感情好好，所以馬明話係笑話一則。
點知噚日又有報道話佢同黃心穎暗撻半年，仲話心穎送咗隻幾萬蚊嘅手錶畀馬明做生日禮物，但係要同馬明拍拖真係唔容易，一來唔可以成日見面，二來又要女方要隨傳隨到，就算連發訊息，馬明都唔會講到好白，費事對話內容外洩！
噚日呢對緋聞情侶喺將軍澳出席活動，佢哋兩個喺現場冇尷尬兼合照，仲齊齊做訪問，否認緋聞，馬明話：「我嚟之前已經有朋友話我知，我當呢啲新聞係宣傳，笑吓就算，唔使特別去解釋，唔知我哋同呢本雜誌關係好咗，會寫吓我哋，可能𠵱家係破冰。」
想收樓收車
講到話心穎送咗隻幾萬蚊錶畀馬明，馬明好抵死對住心穎話：「你下次咪送錶，如果真係要送嘢畀我，不如送樓送車喇！」馬明仲話：「佢（心穎）之前同有婦之夫傳緋聞，𠵱家傳我都好，我係單身，唔難睇呀。」馬明仲話唔介意之後俾人當係情侶檔咁搵錢。之後心穎亦都話緋聞好流，仲話送錶都唔會送畀馬明喇。另一方面，情敵洪永城亦都有喺現場，佢哋仲搭晒膊頭影相，洪永城話：「馬明呢排咁紅，我咪走過去叨吓光。」
撰文：馮仁昭
