導盲犬係視障人士嘅「眼睛」，喺電影同現實世界有數之不盡嘅感人故事。而今年3月首次有香港製造嘅4隻女導盲犬BB出生，4隻導盲犬噚日再亮相，已經「亭亭玉立」。
新一批明年初出世
但香港合資格導盲犬其實只得35隻，視障人士就有17萬咁多。香港導盲犬服務中心估計，最少需要1,700隻導盲犬先滿足視障人士嘅需要。中心主席張偉民話市民都可以幫手，因為明年初有第二批港產導盲犬出世，市民可網上申請做寄養家庭，照顧同訓練導盲犬。
訓練員李苑甄提醒，寄養家庭要住所公契可以養狗，要有一位家庭成員唔使做嘢，家庭須有男有女，有養狗仲要先評估。佢話最難條件係要捨得，捨得照顧一年導盲犬後，要畀番中心訓練，最後配對畀視障人士。寄養家庭成員劉先生照顧緊導盲犬Hardos，佢話分手一刻一定會唔捨得，但認為導盲犬幫視障人士更能發揮作用。