跑步可以消耗卡路里，仲可幫助基層有餐溫飽。將軍澳新都城中心嚟緊同非牟利機構Foodsport舉行名為「為食跑」嘅大型跑步活動，大會按照每位參加者嘅年齡、身高、體重，估算佢哋賽事中消耗咗幾多卡路里，之後買番相等於卡路里份量嘅食物，透過非牟利機構「膳心連」送畀基層人士。
「為食跑」會喺11月15日喺將軍澳舉行，現已接受報名，名額4,000個。賽事分為4公里同8公里兩種，分個人、親子、團體賽；起點係「心曠神怡」嘅日出康城，途經將軍澳海濱公園。個人報名費為290蚊、團隊就收1,160蚊，親子團盛惠490蚊：活動收益（包括報名費）扣除籌辦成本及食物捐贈後，餘款會撥作支持「膳動衡社區運動計劃」。