香港人買手機，好興「舊換新（trade-in）」，美國電動跑車生產商Tesla噚日宣佈，在港推出「舊換新」服務，仲係亞太地區首個推出舊換新嘅市場，乜嘢牌子嘅車都可以拎去trade-in。不過，Tesla淨係會扮演中間人角色，幫車主搵買家，至於賣唔賣得出呢，就唔包生仔嘞。
平時拎手機落電器舖，一般都明碼實價，講明收機價幾多錢，由電器舖直接出錢收機。但Tesla公關同華華講，Tesla嘅「舊換新」，只會扮演中間人角色，幫你搵買家；假設你拎部「錢七」去trade，相信成功賣出套現嘅機會不大。
查實香港車位咁矜貴，養車貴是常識吧，就算已經有車位，買架電動車，業主立案法團畀唔畀安裝充電裝備，都仲係一大難題。