距離2017特首選舉仲有不足兩年，特首梁振英之前講過唔排除競逐連任，之但係攤番開佢當年份競選政綱，仲有一大堆數未找，當中包括「逐步降低強積金戶口內僱主累積供款權益用作抵銷僱員長期服務金及遣散費的比例」，即係取消對沖。梁振英票倉之一嘅工聯會，會長林淑儀都公開講過，支唔支持梁連任言之尚早，首要係「追數」先講。
不過有商界中人笑言，梁振英要找數，商界呢關固然要過，但阻力仲有嚟自政府部門，因為每當有棘手、爭議大、仲要政府官僚落手落腳搞嘅政策醞釀出台時，過往都聽到唔同部門之間推莊嘅事例，而取消強積金對沖呢個燙手山芋，關事嘅財經事務及庫務局同勞工及福利局一直都唔太想沾手，講到強積金自然歸財庫局嘅管，但如果要諮詢同研究又涉及打工仔，亦都有建議係將取消強積金對沖同全民退保一併研究。
翻查資料，其實上個立法會期尾，即係5月底，財庫局局長陳家強回應自由黨田北俊書面質詢時，話明喺僱主、僱員及各持份者未達共識前，政府唔會改變現時可以強積金計劃下僱主供款所產生嘅累算權益對沖遣散費及長期服務金嘅安排；而勞福局局長張建宗喺6月底俾議員問到幾時取消對沖時，就話議題複雜，政府要聆聽各方意見作全盤考慮喎，呢單嘢咁複雜，又涉及到咁多人利益，花生友怕且最後都要好打得嘅政務司司長林鄭月娥出手，先拆得掂。
花生友
周二、四刊出