特首選情被看漲嘅財爺鬍鬚曾近期頻頻有「佳作」，未正式上陣已經將要爭連任嘅特首梁振英打到落花流水，好似最近港隊兩度出戰，鬍鬚曾先喺網誌讚門將葉鴻輝喺中港大戰表現神勇，前晚港隊出戰卡塔爾，佢直情親自到場打氣，獲市民爆like；形勢落後嘅CY唔執輸，完場後即刻出網誌讚港隊，但就被網民鬧佢抽水，有報紙仲爆CY原來冇睇直播，由新聞統籌專員馮煒光「代睇」，呢鋪鬍鬚曾真係贏晒！
話說鬍鬚曾前晚同民主黨李華明一齊入場撐港隊，成場手舞足蹈好肉緊，之後仲喺fb貼相留言「Good match！香港好波！」同港人站在同一陣線，難怪個個畀like。
CY寫網誌補鑊遭噓爆
從來冇讚過港隊嘅CY，唔知係咪見形勢大落後，前晚發表題為「港隊雖敗猶榮」嘅網誌力挽狂瀾，佢話港隊喺球迷支持下，「發揮永不放棄的獅子山精神」，讚香港隊鬥志可嘉，又話港隊𠵱家排名小組第三，仲有機會出線。
網民揶揄CY怕俾財爺攞彩，所以先出網誌「補鑊」，公民黨陳淑莊都喺fb諷刺CY俾財爺食咗頭彩，所以出聲明搶番鏡，叫CY不妨去旺角場睇波，唔噓爆佢至奇！有傳媒噚日問CY點睇場波？CY卻拒絕回應。點解呢？可能根本唔識回應。話說《星島日報》噚日報道，以「據了解」方式話CY對呢場大戰一直關注，不論港隊輸贏都會用網誌以示支持，但因為要喺禮賓府宴客，所以「不忘委託新聞統籌專員馮煒光在家看直播，並須即時向他匯報最新賽果」，換言之CY連直播都冇睇，同財爺入場瞓身支持港隊相比，真係高下立見。
識睇睇留言
Carol Wong：同一件事，由一個先拔頭籌兼形象較佳的人做，有良好公關效果；之後另一個犯眾憎兼劣績斑斑，做乜都俾人認為有陰謀的人東施效顰，就似係曾鈺成講「蠢人做蠢事」
Wing Cheung：夠薑的話就好似品客曾，落場睇啦。
Lau Jackie：（梁）見曾俊華親身出席替港隊打氣又唔抵得、又做電車男，喺網廢X。
Esther Ng：佢（梁）係撐港隊嘅，又唔見佢落嚟支持港隊，人哋鬍鬚曾就有心嘞！
捌久 陸：鏡頭一影完鬍鬚曾，就即刻追番兩球。鬍鬚曾真係勁
Peter Wang：正人君子，去邊一枝公都不怕。小人689？去到邊都皇上出巡。
資料來源：《蘋果》facebook
李八方
mailto:[email protected]