到日本九州旅行放假之時，留番一日在福岡天神站購物區行街購物，適逢各大公司大減價，自己在香港兌換日圓嘅匯率係6.25，折算之下，日本購物好便宜啫，而且可以即刻退回消費稅，好似唔買番啲都對唔住自己，於是乎首先在AOKII買西裝，一件上衣加兩條西褲，只不過係2500港元，合晒身材，衣袖長短都唔駛改，只係西褲一定要改腳，售貨員與肥仔K用日語講數，咬牙切齒話次日中午十二時我地去機場之前可以完工，於是兩人買了四套西裝三件上衣，跟住又到大丸買咗八九件短袖恤衫。
哦，買得過癮，返到屋企就知衣櫃再無空位，老婆下令清理舊衣，於是將三年前在曼谷買落嘅舊衫一一拋棄，有一打咁多，以便騰出空位。舊衣不要，如何處置？是否掉落垃圾桶，或是運往救世軍？點知唔係，菲傭接收晒，話用郵包寄返鄉下喎。
我地衣服過剩，確係要諗吓環保問題。昨日提及嘅年青環保團體Smiley Planet講衣食住行，係有辦法喎，同Smiley Planet三位創辦人梁懷敏、蔡詩琪及鄧志豪講起，衣食住行有四個環保行動。
（一）衣：8月期間，向公眾籌集舊棉質Tee，得聖雅各福羣會庇護工場協助，將舊Tee製成布袋，參加者可在布袋上絲印圖案，擁有獨一無二購物袋。另外聖雅各福羣會之「天衣無縫車衣隊」將公眾捐贈衣物製作成百家被套，捐贈予有需要露宿者。
（二）食：將超市不要之水果製成果醬及漬物，左丁山試過，認為味道唔錯。
（三）住：再循環傢俬，邀請本地設計師KaCaMa Design Lab，LAB，Pokit Brand Builder，以舊物及廢物製作三個椅子系列。
（四）行：昨日講過之Fest Zero Ride，Zero即零排放嘅意思，由西九騎單車至啟德參加現場演唱會，有小塵埃，周國賢，Ketchup，勞嘉怡，黎曉陽，Jun C等人演唱，於十月三日舉行。
老實講，搞環保唔輪到左丁山一類老鬼去發動嘅嘞，我地只能從旁支持，為佢地打氣，Smiley Planet三位創辦人二男一女，其實各有專業搵銀過活嘅，不過難得佢地肯抽出時間，合組一個環保團體向年青人提供新環保意念。在中國人社會搞環保，一定要從年青人做起，從幼稚園做起，兩三代之後，或有所成。