周日沙田賽事，有場戲碼極精彩，就係一班1400米廣東讓賽盃，上季經典一哩賽三甲馬再次較量，當日「美麗大師」輕鬆大勝，灰色神獸「和順超影」得亞軍，另一匹實力派灰馬「大印銀紙」跑第三。
其中原屬苗禮德馬房的「和順超影」上季尾越跑越差，星級印象完全幻滅，本來已經冇乜馬迷對佢有期望，但今個暑假期突然轉投方嘉柏馬房，又令人重燃希望。接手初期小方話「和順超影」上季最後一戰氣管有血，要非常小心操練，以免健康再出問題，但估不到馬兒康復進展遠比預期好，經得起辣操，更已有勇態，於是決定提早上陣爭功。原本「和順超影」已落實重配上季唯一合作贏過的潘頓，上周三亦由潘頓試泥閘得季軍，一切好似好順利，點知轉過頭潘頓受傷，現正休養，小方亦隨即變陣，周一將「和順超影」交畀「Win神」何澤堯（Vincent）過檔彈草閘，小方話隻馬呢課走勢理想，而何澤堯嘅騎功紮實，又有兩磅減，對人馬都有一定信心。
至於「大印銀紙」將由韋達操刀，高伯新透露此馬暑期後有很大進步，今戰跑1400米係最佳路程，希望贏得跨季孖寶。而「美麗大師」就續配郭能，隻馬早前試閘步伐相當強勁，但比起上述兩匹對手，「美麗大師」連同外地只贏過1600米或以上，稍擔心1400米略短。