第四場跑五班一哩三T頭關，賽果尚算正路，啡燈落飛第三熱門「公証揚聖」氣走次熱門「幸運新寶」，轉投呂健威馬房後首度贏馬，史卓豐歴來首晚在快活谷上陣即有進賬，騎練連同開鑼日分別贏「龍城勇將」、「英明神勇」，雙雙保持今季未斷纜。
今場最威是落飛黨，「公証揚聖」啡燈win落到5.2倍，一箸夾中，扣本後約贏900萬，收錢收到手軟。咁都唔止，「幸運新寶」在田泰安胯下追入一席亞軍，11倍啡燈Ｑ，扣本後亦令落飛黨進賬約贏1,200萬，全場共擸2,100萬大豐收！
呢場第三名由大熱門「大寶庫」拎到，鞍上人雷神跑完上半場未入過凱旋門，第四名係霍勵賢座騎「勝利精彩」。呢晚谷草跑A欄，內檔馬越跑越堅，第三、四場分別由1檔馬「加州金獎」同「公証揚聖」後上勝出，包辦第三口孖寶。
呂健威指出「公証揚聖」很怕馬，所以向史卓豐教路，是盡量在外面展開衝刺，結果騎者依足指示，發揮令人相當滿意。