第四場開完熱門，第五場四班千二米即刻爆鑊甘，熱到唔夠兩倍之「大收成」配韋達拉士走內欄，衝落唔多，結果三甲不入尾二而回，反為一對綠燈落飛馬「光速銀桂」及「偉寶之星」一追一放，卻出其不意地包辦頭二名，綠燈Q都有118倍，「光速銀桂」開出綠燈win則29倍，和味得很。
「光速銀桂」馬主係中國前體操王子李寧，年前佢透過輸入專才計劃落戶香江，而家已經係如假包換之香港人，不過李寧這晚冇出現，由好友何麗全代拉頭馬。「光速銀桂」一向只贏中距離，短途從未威過，今場可謂突如其來，鞍上人何澤堯跑到第二個賽日終於開齋，佢師傅方嘉柏則連勝兩期未斷纜。
今場「偉寶之星」黃皓楠放到尾力竭，輸半身位得亞軍。三、四名「樂有贏」及「爆炸糖」分別由巫斯義及雷神策騎，「爆炸糖」亦由方嘉柏訓練，3.7倍次熱門跑落唔及29倍冷門廐侶「光速銀桂」好，有底出之嫌，賽後即見方嘉柏風騷嗒薄荷糖，四重彩則派76,880元。
方嘉柏指賽前已對何澤堯表示「光速銀桂」有機會跑近，盡量跟前些少，堯仔跟足指示，小方認為馬兒能贏嫌短之千二米全靠新鮮感，稍後會回跑一哩，但此馬加分後，升上三班或有點吃力。