喺呢次世盃外，香港足球踢出鬥志，旺角場全場爆滿，獲得全城市民關注，唔知阿爺會唔會有啲擔心呢？阿爺嘅擔心，當然唔係指怕港足搞到國足冇得出線咁簡單啦，係超越足球層面上嘅擔心。
一直以來，足球都有政治功能，既可以團結內部人心，仲可以對外宣傳一個國家、地區或者民族。百年以嚟，幾多政權，幾多領袖，都識用體育同足球去幫助統治。阿爺每年投放咁多資源搞體育，爭做奧運獎牌榜第一，都係想團結人民同揚威國際。
相反，特區政府成日話搞體育，但搞嚟搞去都冇點進步過，小弟真係不禁陰謀論咁懷疑，係咪阿爺下命令，香港體育唔可以搞得太成功，以防香港嘅本土意識藉體育嘅成就抬頭。
唔講陰謀論，港足連贏不丹同馬爾代夫，再作客守和中國，到落後卡塔爾三球之下力追兩球，要成績有成績，要熱血有熱血。港足已經成功團結咗大部份香港人，一齊去打氣。支持港足，其實就係一種潛移默化嘅身份認同，肯定自己係香港人嘅身份。喺西班牙嘅加泰隆尼亞，獨裁者佛朗哥打壓咗加泰獨立好多年，但一隊巴塞隆拿，一個魯營球場，就令加泰人嘅精神一代一代傳落去。
雨傘革命後，香港本土意識抬頭，港足有可能成為一個將本土意識感染全民嘅平台。若果港足之後主場贏咗或者又和咗國足，唔單止國足教練佩連愁，可能連負責港澳事務嘅張德江都會感到唔安心。
文：咖喱