𠵱家上網真係好方便，手痕搵吓網上字典，狗字嘅廣東話同音字有九、枸、久等，小島主管足球嘅主席狡辯看似成立，不過搵一搵普通話字典，狗字同音只係苟、岣等，冇主席所講嘅久字喎，狗定久，大家心裏有數。
「狗久」事件後，小弟面書嘅行家圈廣泛討論，一位前足球記者就留言：「努力興建、盡情破壞」，後生啲嘅讀者未必知呢句出處，其實係電視劇《飛越十八層》主題曲《難為正邪定分界》，由凡人同魔鬼對唱，邊句出自凡人，邊句出自魔鬼，大家一樣心裏有數。
港隊主場三連爆，雖然喺座位唔多嘅旺角場，但都好難得，甚至呢幾日受各大傳媒爭相報道，連以往慣常以謝賢或葉玉卿全家福做封面嘅周刊，竟然難得咁以英雄輝做封面，湊一湊熱鬧，呢啲絕對唔係主席嘅功勞。
有破壞冇建設，相反主席賣港事件多籮籮，為咗遷就客軍日本國內直播，要求港隊主場比賽提早開波，國歌事件亦講多錯多。坦白講，國際足協對種族歧視係執得好緊，不過自己球迷噓自己國歌，究竟有冇自己歧視自己呢樣嘢，小弟真係唔知；正如法國球迷狂噓前鋒基奧特，小弟睇唔到柏天尼或迪甘斯出嚟講，再噓就會被罰閉門作賽。主席好嘅唔做，衰嘅就做足，如果趕走埋碩果僅存嘅本地球迷，就真係可以專心閉門作賽喇。
港隊周二2:3輸畀卡塔爾，雖然輸波，但尾段拼勁仍然激勵人心，真心想香港足球搞番起嘅球迷，真係唔好洩氣，11‧17再見！
文：牽牛