巴西喺周二晚嘅國際足球友誼賽以4:1大炒美國，除咗為主帥鄧加減減壓外，亦都送咗執教以嚟最大嘅敗仗畀美國教練奇連士文。呢場波最威嘅當然係尼馬，下半場先出場嘅佢，只係用咗22分鐘就梅開二度，幫巴西上陣67場就入咗46球，直頭摑咗近兩場都唔畀佢正選出場嘅鄧加一巴。賽後鄧加就死撐話為咗即將舉行嘅世界盃外圍賽，必須試唔同嘅攻擊組合，嚟緊一定會重用返尼馬，叫大家定啲喎！
至於身在美國嘅尼馬迷就真係唔好彩喇！事關尼馬近兩場喺美國嘅比賽總共只係代表巴西上陣咗53分鐘，但係比賽門票就相當貴；單係對美國嘅比賽就要成750蚊美金，對於入場又睇唔到尼馬踢足全場嘅美國球迷，都咪話唔肉痛。好在最後尼馬都交出好表現，如果唔係相信佢哋會喺球場大嗌「回水」！