早前因為人民幣貶值，導致公司損手6,000萬元嘅I.T（999）宣佈，財務總裁（CFO）曾慶洪辭職，成為6年來第3名辭職嘅CFO。主席兼行政總裁沈嘉偉家陣要做多瓣，一日畀佢48小時都未必掂。
I.T無講曾慶洪辭職嘅原因，但市場好多人都估，辭職同「炒燶」人民幣有關。之但係，I.T都唔算係「炒人仔」，只係做咗近12億元人仔定存，誰不知上月央行突然將人民幣貶值，搞到I.T錄得6,000萬元損失，仲要發埋盈警。
不過話說回來，I.T財務總裁呢個位，一直都唔易坐。計埋曾慶洪，自2009年起已經係第3個走。做過副主席、董事總經理兼財務總裁嘅盧永仁2009年辭職，2010年底由潘耀明接任；潘耀明做咗10個月就劈炮，舊年先請到做過大酒店（045）與嘉華（173）嘅曾慶洪，佢家陣都走了。