大家記得這一幕嗎，對飲食界名人幟哥黃永幟嚟講，應該好難忘。講緊嘅係今年5月中，幟哥嘅愛駒「為食仔」，喺快活谷一哩賽事，打開勝利之門兼捧盃。咁都唔止，跑第二嘅「搖錢樹」，幟哥亦係馬主之一，賽後佢自爆中咗這條近39倍單Q，即係買10蚊就收390蚊，但以幟哥嘅注碼點會只買10蚊，如果細細哋買1000蚊，都已經執近4萬蚊。
好喇，隔咗一個暑假，「為食仔」將於周三(9日)復出上陣，上月底幟哥特登準備咗八隻大燒豬，帶入所屬沈集成馬房，參加季前拜神儀式，希望愛駒生生性性、健健康康。
「為食仔」今次跑番贏馬嘅快活谷一哩，相信有唔少人重視，但幟哥就好老實，呼籲馬迷唔好中招：「『為食仔』唞暑這段日子都幾開胃，體重上升咗，馬亦紥實咗，但試閘感覺佢仲未上力，希望跑一兩次熱身後會好啲啦！」
睇番隻馬本月初試泥地閘操練，走勢的確唔多開胃，沿途居後，直路騎落反應欠佳，11隻馬中跑包尾，狀態似乎未操起，難怪幟哥話愛駒「未上力」，照咁睇馬迷真係可以慳番啲注碼，揀過第二隻馬咯！