上一任食物及衞生局局長周一嶽，一首《忘不了你》震懾歌壇，仲俾人稱呼為「官場技安」，反而現任局長高永文就較少聽到佢唱歌，唔知佢歌喉如何。噚日民望高出席睛彩慈善基金嘅新聞發佈會，就剛好遇上《忘不了你》原唱「譚校長」譚詠麟，以大使身份出席同一活動，但無論係高局長定係譚校長，兩個都冇開金口獻唱，只同大家分享吓護眼心得。
雖然譚校長經常話自己係年年25歲，但其實佢比高局長仲要大幾歲，噚日兩個人企埋合照，論身形，肚腩凸凸嘅譚校長固然輸蝕，但高局長都雙眼無神，睇起來相當攰吓，唔知係咪因為近日俾一班零售同藥房業界人士，要求撤銷限奶令，搞到冇覺好瞓呢？