信名牌，捧上盤，禮拜一就真係輸死人咯！喺歐國外D組，世盃冠軍德國贏波唔贏盤，作客險勝蘇格蘭3:2，佢哋開開心心繼續排榜首，但相信一眾捧場客就揼晒心口。除咗德國之外，葡萄牙都毫無強隊霸氣，作客阿爾巴尼亞要去到補時階段先至入波，贏得一球咁大把，而丹麥、羅馬尼亞就仲衰波，贏都贏唔到。
德國又輸盤正衰波
如果純粹睇入波嘅話，呢場德國作客蘇格蘭都幾好睇，但若果真金白銀去捧德國，呢場真係好似坐過山車咁。湯馬士梅拿18分鐘就幫德國開紀錄，諗住有個好開始啦，點知冇耐之後曉姆斯擺烏龍，幫蘇格蘭追平1:1。34分鐘，腳風順到極嘅梅拿入多粒，上盤客又有希望，但半場未到又被追平成2:2。54分鐘，根度簡為德國再次領先，之後仲有大把時間，以為德國可以繼續入波，點知最後竟然收油，贏一球夠數，險勝蘇格蘭3:2就算。德國呢場讓一球，開唔出上盤，直取「讓球主客和」「客勝」嘅朋友仲連本都輸埋（見附表）。
喺今屆歐國外，德國都算得上係衰波之王，成日都贏波唔贏盤，兩循環對蘇格蘭都係贏一粒，三月作客格魯吉亞贏2:0，又係開[-2]「讓和」；但最衰嗰場肯定係舊年11月主場對「魚腩」直布羅陀，德國「讓球主客和」[-7]，但贏得4:0，令捧場客極之失望。
周一贏波之後，德國以19分排榜首，領先第三位嘅愛爾蘭四分，只要德國下輪作客愛爾蘭唔使輸，就可以晉身決賽周。德國主帥路維話，下場唔會求和，「呢場對蘇格蘭，我哋明顯係踢得較好嗰隊，製造到好多機會。我期望下場對愛爾蘭繼續贏。」
葡軍C朗仲未開齋
另外，F組嘅羅馬尼亞同I組嘅丹麥都好失威。羅馬尼亞𠵱家世界排名第七，主場對住小組包尾嘅希臘，諗住實食冇黐牙，但最終踢成0:0。至於丹麥作客世界排名83位嘅阿美尼亞，亦都踢成0:0。另一支I組勁旅葡萄牙都令人失望，佢哋作客阿爾巴尼亞，基斯坦奴朗拿（C朗）繼續入球荒，僅靠米基爾維洛素補時一箭定江山，先贏到1:0，叫做幫到上盤客贏到半格。