公民黨郭家麒早排食完日本咖喱後勁肚痛，連日不斷肚屙，懷疑自己食物中毒，但就冇影響佢今朝一早7點起程，飛去台灣「見醫生」！不過大家咪誤會，郭醫生唔係肚屙都要飛去台灣搵名醫求醫，而係去見人稱「柯P」嘅台北市長柯文哲，希望向佢就飲水機同醫療等問題取經，兩人暫定會面半小時，郭亦會見埋新北市副市長侯友宜。
送贈《每一把傘》
點解郭醫生要去台灣睇飲水機？佢話台灣有好多乾淨嘅水機，希望香港嚟緊全部港鐵站都加裝，大家可以帶個水樽就有乾淨水飲。郭又話復會後，計劃提動議辯論「乾淨飲用水法例」，希望加強監察食水安全。
郭醫生仲話今次準備咗三份禮物畀柯P，包括佢自己本舊作《麒人》，講雨傘運動嘅書《每一把傘》，同一個環保膠樽，透露自己6月去信對方後，好快收到回覆，郭醫生講笑話，柯P咁快答應，唔知係咪因為自己同佢一樣，都係外科醫生、曾喺美國受訓，又係從政喎！但由於郭醫生普通話相當普通，為怕柯P聽唔明，所以相信隨時「轉台」講英文。