新民黨主席葉劉淑儀（圖）緊跟中央路線，搶閘牽頭成立「海上絲綢之路協會」，前日舉行成立典禮都好大陣仗，政商界猛人畀面出席之餘，唔少仲喺協會有職銜，外界自然揣測佢搭定個台，唔知係咪為佢2017年特首跑馬仔造勢？
話「絲路」唔關事
葉劉噚日接受電台訪問介紹協會工作，主持人一開波緊係問佢係咪為選舉鋪路啦，佢叫大家「千祈唔好誤會」，強調協會內好多成員都冇票在手，參與團體包括海上絲綢之路沿線省市在港的社團、僑界團體，所以香港江蘇社團總會會長唐英年都好支持，而另一名譽會長，身兼全國政協常委嘅恒基兆業地產集團副主席李家傑，葉劉話對方係政協「一帶一路」小組組長，大家係畀面國家政策，完全唔關2017事喎！至於出面其他人信唔信呢？八方覺得好難講！