散戶噚日都要講聲多謝「秋官」鄭少秋呀！秋官主演嘅電視劇《誓不低頭》上星期五終於大結局，唔知係咪真係咁邪，港股星期一再插多下之後，噚日竟然顯著反彈，「小超人」李澤鉅旗下長江基建（1038）收市後又宣佈計劃同電能實業（006）合併，忽然間，市場氣氛好番好多咁喎。
今年4月港股升到嘭嘭聲，大台即刻喺4月下旬重播秋官主演嘅《大時代》，港股就即刻呆晒，恒生指數keep住喺27000至28000點區間徘徊，間中chok上chok落，冇晒升勢。大台之後喺7月尾再重播《誓不低頭》，結果呢次厲害嘞，由套劇開始重播到上周五，恒指跌咗3657點，希望秋官效應遠離，股市升番喇。