新世界和康文署向城規會提交擴建星光大道申請書，列明計劃已獲海濱事務委員會屬下九龍、荃灣及葵青海濱發展小組支持，但小組主席盧珮瑩前日話，「專責小組未有機會討論及了解詳情，所以談不上我們支持這個計劃」。嘩，向城規會提交失實資料，即使唔犯法，都係行政失當，市民大可向申訴專員投訴。
不過城規會副主席黃遠輝（圖）做事都算有效率，佢噚日接受「壹錘定音」訪問話，佢獲悉報道已馬上聯絡規劃署搞清楚件事，並承諾促請規劃署澄清，因為當日申請書係由規劃署代表新世界、康文署呈交城規會。主持人李慧玲追問黃遠輝係咪聯絡署長？就喺呢個時候，電話突然斷線！他稍後WhatsApp話電話剛剛無電，唔好意思咁話！睇嚟部電話真係一部名副其實嘅「Smartphone」。