公關大姐大平素識飲識食，又因公關事宜，不停搞飯局，林超榮為佢改一個花名叫做「飯局皇后」。搞飯局，有人以為好容易，殊不知中間有好多技巧，左丁山聽大姐大講得多，心領神會，但不便寫出嚟。左丁山參加過公關飯局無數，見過滑稽場面不少，最過癮有一次在大酒店咖啡室吃中午自助餐，咖啡室內坐滿人，聲音嘈吵，而且係自助餐㖭，我地與主人家以及負責嘅公關公司代表要離枱搵嘢食，無法子集中精神及注意力，但係主人家（大公司外籍MD）拿出手提電腦做presentation，想班傳媒人留意喎，留意個鬼咩，佢講得細聲，我地聽唔清楚，因咖啡室太多雜音，佢講大聲啲，其他食客都會聽到。最後MD唯有識趣收埋電腦，與我地閒談了事，個心就幾唔高興咯。大姐大知道之後，笑到半死，佢話：「大公司向傳媒做presentation，最緊要包一間酒店或餐廳嘅私人房，預備埋熒幕及半小時吃飯前時間，而且一定要事先點好菜，忌吃自助餐。此乃常識！」哦，呢種常識原來連公司MD都唔識。
大姐大最近做咗一間機構嘅董事，久唔久就要開董事會，問佢所為何事，佢話：「珍惜廚餘與多餘食物呀。個機構叫做『惜食堂』，得到唔少善長及上海總會捐錢支持，喺港島及九龍有廚房，每日製造及派發8000個飯盒俾無依靠長者。我地搵到大超市支持，每日有賣唔去及即將到期嘅食品送俾我地（以前呢啲食物係棄物）做飯盒，還有其他食材來源嘅，總之人人做義工，為社會作些微貢獻啦。」之後佢又送左丁山一小樽橙皮占，問佢從何而來？有分教。
三位年輕人有一個環保意念，得到「渣打香港150週年慈善基金」贊助成立／創辦一個叫做Smiley Planet嘅環保團體，展開不同嘅推廣環保工作，在「衣食住行」四大範疇諗出新方法，誘導大眾減少廢物，減少排放，珍惜食物及循環使用概念。其中一項係製造果醬，把「惜食堂」從超市收集得來嘅水果，製成果醬，果醬又可製成糕點。譬如吃西瓜，吃完之後，瓜子可炒菜，不吃之白色部分刮下來可做漬物，綠色西瓜皮可搗爛做西瓜霜，西瓜任何部份都可用盡。大姐大話Smiley Planet會在9月19日至22日在荷李活道元創方及港大黃克競平台辦展覽，10月3日辦Fest Zero RIDE，與Slow Mo合辦環保單車遊，由西九龍踩到啟德跑道開演唱會，大家不妨留意！