新一屆維港泳喺10月18日舉行，大會今年搵嚟各界人士「落水支持」，拍咗輯水底照為參加者打打氣。今次被「拉落水」嘅包括一向嚴肅嘅立法會主席曾鈺成，但八方見其他「落水」人士個個濕晒身，點解得曾主席可以舒服又乾爽「在水中央」，坐喺張充氣浮床主席椅上﹖
八方透過立法會秘書處問過曾主席係咪唔肯「落水」，得到嘅回覆係點擺「甫士」係大會安排嘅。佢接受訪問時仲笑言，張充氣主席椅又軟又舒服，可以考慮拆返去坐，換咗𠵱家嗰張。其實過往都有立法會議員參加維港泳，曾主席今年會唔會真正「落水」一齊游呢？佢就話好耐冇游過長距離，如果有時間加緊練習，相信自己都完成到維港泳喎。