華將梁家俊名氣雖然唔及雷神、潘頓，但佢絕對係實力派，就以周三（9日）快活谷夜賽為例，家俊仔係唯一跑足八場嘅騎師，可見好多廐主支持佢。
家俊仔除咗騎馬係實力派外，佢個荷包原來亦係實力派，雖然只得27歲，但幾年前已經做咗業主，買入沙田帝堡城細單位，早前佢接受訪問，更透露已經換樓，購置馬鞍山樓盤「迎海」一個實用面積800幾尺單位，單係首期已要500萬，作為同靚靚未婚妻阿Kit嘅愛巢。家俊仔仲自爆，由於自己生活簡單，一年可以儲一至兩百萬元，真係恨死隔離。
家俊仔話未來仍會再買樓收租；想達成願望，梗係要贏多啲馬啦。今期佢嘅座騎中，固然要留意「天地福星」，上季初出就跑第二，毋須熱身亦能跑得好，今次角逐谷草1200米，隻馬過去喺呢個路程贏過三場，最具威力，今朝（7日）家俊仔親操「天地福星」，座騎表現淡定，狀態好有水準，當然不能睇低。
仲有尾場「精壯神駿」，早前試嘉年華大閘追入第二，亦及時谷起，抽埋個三檔，分分鐘就咁食尾糊。