人行行長周小川在上周末，於G20財長會上撐A股，話股市調整已結束，但中港股市仍然唔畀面，昨日照跌。連周小川講話都冇用，有內地股民寄望，總理李克強會打救A股。而家中國股市立立亂，更成為全球金融風暴源頭，李克強即將喺周三開幕的夏季達沃斯會議上講話，唔少人預期屆時將為A股打氣。不過，以佢發言往績嚟睇，恐怕又將失望而回。
達沃斯會議雲集全球頂尖商界人物，商討政經大事，一年於冬季同夏季，分別開兩次會。李克強由2013年9月起，已經三次參加達沃斯會議，在之前三次講話中，只談中國經濟冇問題，金融冇危機，但就一直避談股市。
事實上，自李克強上任以來，從來冇就股市直接發表言論，同前任總理溫家寶不時公開發表股市意見好唔同。有傳「暴力救市」係由李克強提出，但至今唔敢承認。佢對股市態度曖昧，亦為呢場救市，被搞到唔湯唔水主要原因。
黃尹華