近排天氣開始乾燥，不少絲打們只顧住面部肌膚這第一道防線，往往忽略手腳的護理。雙手感覺特別乾，雙腳腳皮也開始浮現，除了塗潤手霜潤腳霜，其實手腳也可以敷mask進補。頗喜歡美國karuna新推的手mask腳mask，以天然木漿製成的手套腳套質感厚身，套內含有蘆薈、透明質酸、洋甘菊及中國甘草等精華液。戴上手套後貼上膠紙鎖緊手腕，敷15至20分鐘，最大特色是可方便繼續工作，設計十分細心。我試過揸車都冇問題，絕無滑來滑去跣手的感覺。大家都知機艙特別乾，帶定一對手套腳套搭長途機用也十分方便，敷完後只要稍稍按摩待精華吸收，包你大叫滋潤。若然絲打們想慳慳哋，其實只要敷厚厚一層潤手霜，戴上透明膠手套焗一陣也會有相若功效。
如果你腳皮較多，事前最好先做一個磨砂，不過Lush火山泥腳mask就同時兼備去除過多老化角質的功能，泥mask內含木瓜成份、肉桂葉精油、新鮮番茄及高嶺土等，塗上腳至小腿位置，再以保鮮紙包裹10分鐘，然後輕輕打圈按摩，最後用清水洗淨便可。試用後發現，小腿有十分清涼的感覺，有效紓緩雙腳疲勞，唯獨使用時的感覺比較論盡，泥又乾得快，包保鮮紙又唔係咁易，掉到四處都是白泥，所以都是留在浴缸敷比較好，記得帶埋個電話隨身，否則戇居居對住個浴缸都唔做咩好。
記者：許維雅
攝影：伍慶泉
查詢：
a/ Joyce Beauty（中環新世界大廈地下）
b/ Lush（尖沙嘴加連威老道24A號）