有「地產狂人」之稱嘅融創中國（1918）創辦人孫宏斌忽然辭任行政總裁（CEO）！噚日融創中午突然停牌，夜晚出公告話，孫宏斌已經辭任CEO，只任主席，認真嚇市場一跳。
市場之所以咁驚訝，主要係因為孫宏斌屬於公司靈魂人物，而且只係52歲，正值壯年，事前毫無退休嘅迹象，8月底佢仲用咗超過1,500萬元增持自己公司。
孫宏斌近年仲好有魄力咁不斷四出收購，雖然最終入股綠城（3900）、佳兆業（1638）失敗，但都贏得唔少分析員嘅掌聲，欣賞佢佈局夠晒進取，係唔少投行嘅內房之選。
孫宏斌今次辭任CEO，只留任主席，市場隨即多多揣測，有人擔心佢係因為健康出問題，亦有人覺得佢退任係因為形象太過火爆，退居幕後指揮令機構投資者冇咁擔心。截稿之前，孫宏斌嘅微博仲未有更新，唔知佢會唔會出嚟交代一下呢？